“肥仔个头大过五层楼；肥仔只手细过荷兰豆……”呢首粤语儿歌入边讲嘅“五层楼”，就系而家嘅镇海楼。喺广州四大崇楼入边，佢都系最出名嘅一座。以前有句老话就叫做“未登五层楼，不算到广州。”
镇海楼建喺越秀山嘅小蟠龙冈上边。因为明朝嗰时，珠江水面宽阔，登楼远望，可以睇到一望无际嘅江面，所以啱开始佢系叫做“望海楼”嘅，后嚟先至改名“镇海楼”，寓意雄镇海疆。佢曾经五毁五建 ，最后呢次修建喺1928年，由砖石木结构改成砖石混凝土结构。而家市民睇到嘅五层楼，除咗部分砖石木柱，其他都系民国时期嘅建筑。从1929年开始，佢就成为当时广州嘅市立博物馆。
镇海楼系一座好奇特嘅楼，佢“楼成塔状，塔似楼形”，成栋好似塔噉，逐层逐层变细收分，最开始嗰时，每层都有回廊。关于起楼嘅原因，以前有几个讲法。有啲话系风水楼，因为岭南近水，宜用土嚟克制；仲有一种讲法系佢要镇住紫黄“王气”。其实，佢更多系出于城防嘅军事考虑，因为明朝嗰时城墙扩建，围到咗越秀山，系度起一座高楼，就成咗全城嘅最高点，可以瞭望放哨。
所以，镇海楼就成咗以前广州嘅地标。嗰时，坐船嚟广州做贸易嘅外国人，远远望到镇海楼，就知道到咗广州啦。◎阮栩 编辑
文献来源：2019-05-09 信息时报-A19
作者：阮栩
查看相关：